← Бүх нийтлэл

Байнгын худалдан авагч бий болгох: харилцагчийн бүртгэл ба оноо

Хэрэглэгчид хэсгийн сегмент, таг ба тэмдэглэл, онооны ба тамганы картын хөтөлбөр, төлөөгүй захиалгын сануулга: худалдан авагчаа эргүүлэн ирүүлэх арга.

Байнгын худалдан авагч бий болгохын тулд хэн, хэдэн удаа, юу авсныг мэдэж, эргэж ирэх шалтгаан өгөх хэрэгтэй. OpenShop-ын Хэрэглэгчид хэсэг бүртгэлтэй болон зочноор захиалсан худалдан авагчдыг нэг жагсаалтад сегментээр нь харуулдаг бөгөөд Маркетинг → Оноо хэсгээс дэлгүүрийнхээ онооны эсвэл тамганы картын хөтөлбөрийг асааж болно. Оноо мөнгө биш, зөвхөн танай дэлгүүрт хямдрал болж зарцуулагдана.

Хэрэглэгчид хэсэг юуг харуулдаг вэ?

Консолын Хэрэглэгчид хэсэгт бүртгэлтэй болон зочноор захиалсан бүх худалдан авагч нэг жагсаалтад гарна. Зочны захиалгуудыг утасны сүүлийн 8 оронгоор нэг хүн гэж тооцно. Нийт худалдан авалт нь төлөгдсөн болон хүргэгдсэн захиалгын барааны дүн бөгөөд хүргэлтийн төлбөр орохгүй. Хэрэглэгч дээр дарахад түүний карт нээгдэж төлсөн захиалга, нийт худалдан авалт, дундаж захиалга, сүүлийн захиалга, захиалгын түүх харагдана.

Сегментийг хэрхэн ашиглах вэ?

Систем худалдан авагч бүрийг худалдан авалтын давтамж, сүүлийн захиалга, дүнгээр нь Байнгын, Шинэ, Дахин ирж магадгүй, Алдах эрсдэлтэй, Идэвхгүй болсон, Захиалаагүй зэрэг сегментэд шөнө бүр ангилна.

  • Шинэ худалдан авагчид хоёр дахь захиалгаа хийх шалтгаан өгнө: дараагийн худалдан авалтад хэрэглэх купон, шинэ бараа гарсан тухай мэдээ.
  • Алдах эрсдэлтэй худалдан авагчтай өмнө нь авсан бараатай нь холбоотой шинэ бараагаар дахин холбогдоно.
  • Байнгын худалдан авагчдыг таг, тэмдэглэлээр тэмдэглэж, онцгой анхаарал хандуулна.

Нэр, имэйл, утсаар хайж, шүүлтээ нэрлээд Шүүлтүүр хадгалах товчоор хадгалбал дараа нь нэг товчоор дуудна. Таг (жишээ нь VIP, бөөний) нэмж жагсаалтаа тагаар шүүнэ. Дотоод тэмдэглэл зөвхөн танай багт харагдана. Тэнд регистрийн дугаар, картын дугаар, эрүүл мэндийн мэдээлэл бичихгүй.

Онооны хөтөлбөрийг хэрхэн тохируулах вэ?

  1. Маркетинг → Оноо хэсэгт Төрөл дээр Оноо (₮-өөр цуглуулна) эсвэл Тамганы карт сонгоно.
  2. Оноо бол Хэдэн ₮ тутамд, Хэдэн оноо, 1 оноо = ₮, Зарцуулах доод оноо, Нэг захиалгын дээд хувь (%) талбаруудыг бөглөнө.
  3. Тамганы карт бол Тамга авах доод дүн, Хэдэн тамгаар шагнал, Шагнал (₮ хямдрал)-ыг бөглөнө.
  4. Дуусах хугацааг сараар оруулна: 0 бол дуусахгүй, эсвэл 3–24 сар. Купонтой хамт ашиглаж болох эсэхийг сонгоно.
  5. Нөхцөл талбарт дэлгүүрт харагдах тайлбараа бичээд Асаах товчийг дарна.

Жишээ нь 1,000₮ тутамд 10 оноо, 1 оноо = 1₮ гэж тохируулбал худалдан авагч худалдан авалтынхаа 1%-тай тэнцэх хямдрал цуглуулна. Кофе шоп, гоо сайхны салон гэх мэт байнга давтагддаг худалдан авалттай бизнест тамганы карт ойлгомжтой: жишээ нь 10 тамгаар 10,000₮ хямдрал.

Оноо мөнгө биш гэдгийг яагаад ойлгох хэрэгтэй вэ?

  • Оноо зөвхөн танай дэлгүүрт хямдрал болж зарцуулагдана. Бусдад шилжүүлэх, бэлнээр авах боломжгүй.
  • Оноо зөвхөн нэвтэрч захиалсан худалдан авагчид цуглана. Зочин оноо авахгүй тул худалдан авагчаа бүртгүүлэхийг урамшуулна.
  • Төлбөр төлөгдөхөд оноо хүлээгдэж буй болж, захиалгыг Хүргэсэн гэж тэмдэглэмэгц зарцуулах боломжтой болно.
  • Шинэ дүрэм зөвхөн цаашдын захиалгад хамаарна. Хөтөлбөрийг унтраахад оноотой хэрэглэгчид оноогоо 30 хоногийн турш зарцуулж болох ба тэдэнд нэг имэйл мэдэгдэл очно.

Оноо төрлийн хөтөлбөртэй бол Оноо хуудасны Сэтгэгдлийн оноо хэсгээр бараандаа сэтгэгдэл үлдээсэн худалдан авагчид оноо өгч болно. Од хамаарахгүй тул зөвхөн эерэг сэтгэгдлийг урамшуулдаггүй.

Төлөөгүй захиалгын сануулга хэрхэн ажилладаг вэ?

Нэвтэрсэн худалдан авагч захиалга үүсгээд төлөөгүй бол ойролцоогоор 1 цагийн дараа бүртгэлтэй имэйл рүү нь нэг удаа сануулга очиж, сагсаа нэг товчоор сэргээнэ. Имэйл 09:00–21:00 цагийн хооронд явах ба нэг хүнд 7 хоногт нэгээс олон удаа явахгүй, хөнгөлөлт агуулахгүй, татгалзах холбоостой. Тохиргоо → Маркетинг таб дээрх Төлөөгүй захиалгын сануулга картын Имэйл сануулга илгээх унтраалгаар асааж, унтраана.

Харилцагчийн мэдээллийг хэрхэн хариуцлагатай ашиглах вэ?

Холбоо барих мэдээлэлтэй CSV татахад татсан тухай бүртгэл үлдэнэ. Худалдан авагчийн утас, имэйлийг зөвхөн захиалга ба тэдний зөвшөөрсөн мэдээлэлд ашиглана. Хэтэрхий олон мессеж худалдан авагчийг холдуулдаг тул цөөн, хэрэгтэй, хувийн шинжтэй харилцаа илүү үр дүнтэй.

Дэлгэрэнгүй заавар

Хэрэглэгчид хэсгийг Захиалга ба харилцагч, оноо ба сануулгын тохиргоог Маркетинг гарын авлагаас үзнэ үү.

Өөрийн дэлгүүрээ нээгээрэйХэдхэн минутад — бүртгэл, сарын хураамжгүй.
Дэлгүүрээ нээх →
Блог

Бусад нийтлэл

  1. Бэлгийн карт: баярын улиралд борлуулалтаа нэмэх нь

    Зөвхөн танай дэлгүүрт зарцуулагдах бэлгийн карт: дүн ба хугацаа, 20% хүртэлх бонус, дизайн, хэвлэх, CSV-ээр бөөнөөр олгох, и-баримт, сануулга.

  2. Худалдан авагчийн итгэлийг хэрхэн нэмэх вэ

    ДАН-аар баталгаажсан эзэмшигч, бодит худалдан авагчийн сэтгэгдэл, нөхцөлийн хуудас, холбоо барих мэдээлэл, и-баримт, өөрийн домэйн: итгэл төрүүлэх алхмууд.

  3. Ажилтантайгаа хамт дэлгүүрээ удирдах: эрхийг зөв хуваарилах нь

    Нэг нууц үг хуваалцахын оронд хүн бүрт тусдаа бүртгэл: ажилтан нэмэх, Эзэн, Админ, Ажилтан эрхийн ялгаа, өөрийн эрхийн төрөл үүсгэх арга.