Facebook-ээс ирсэн худалдан авагчаа алдахгүй байх 5 арга

Олон дэлгүүрийн хувьд зочдын ихэнх нь Facebook, Instagram дээрх пост, зараас орж ирдэг. Гэвч сонирхож орж ирсэн хүн бүр худалдан авалт хийдэггүй: апп дотор нээгдсэн хуудаснаас банкны апп руу шилжихэд гацах, «дараа авъя» гээд мартах, зар ямар үр дүн өгснийг мэдэхгүй байх гэх мэт. Энэ нийтлэлд ийм алдагдлыг багасгахад OpenShop дээр аль хэдийн ажиллаж буй таван арга замыг тайлбарлая.

1. Facebook-ийн дотоод хөтчөөс төлбөр рүү саадгүй шилжүүлэх

Facebook эсвэл Messenger дээрх холбоос дарахад хуудас апп доторх хөтчид нээгддэг. Энэ хөтөч дотроос банкны апп руу шилжих, QR-аар төлөх нь заримдаа гацдаг. Худалдан авагч захиалгаа хийчихээд төлж чадалгүй орхих түгээмэл шалтгаан энэ.

OpenShop-ын захиалгын хуудас апп доторх хөтчийг автоматаар таньж, захиалга үүссэний дараа худалдан авагчид гурван сонголт санал болгоно:

• Хөтөчөөр нээж төлөх — iPhone дээр Safari, Android дээр үндсэн хөтчөөр төлбөрийн хуудсыг нээнэ.
• Энд үргэлжлүүлэх — апп дотроо төлөхийг хүсвэл.
• Холбоосыг хуулах — өөр хөтөчид буулгаж төлөх.

Захиалга аль хэдийн үүссэн тул хөтөч солиход дахин бараа сонгох шаардлагагүй. Энэ нь бүх дэлгүүрт, цаг захиалга ба төлбөрийн холбоост ч адил ажилладаг — та юу ч тохируулах шаардлагагүй.

2. Төлбөрөө дуусгаагүй худалдан авагчид сануулах

Захиалга хийгээд төлбөрөө дуусгаагүй, хугацаа нь дууссан захиалгад OpenShop нэг удаа сануулга имэйл илгээнэ. Имэйлд дэлгүүрийн нэр, барааны нэрс, нийт дүн, «Захиалгаа үргэлжлүүлэх» товч байна. Товч дарахад худалдан авагчийн сагс бараатайгаа сэргэж, шууд төлбөр рүү орно.

• Сануулга захиалга үүссэнээс нэг цагийн дараа, зөвхөн өдрийн 09:00–21:00 цагийн хооронд очно.
• Зөвхөн нэвтэрч захиалсан, бүртгэлдээ имэйлтэй худалдан авагчид очно. Зочноор захиалсан хүнээс имэйл авдаггүй тул тэдэнд илгээгдэхгүй.
• Нэг хүнд хэт олон сануулга очихгүй хязгаартай бөгөөд имэйл бүр татгалзах холбоостой.
• Хэдэн захиалга ингэж сэргэснийг Тайлан хэсгээс харна.

Энэ боломж анхнаасаа асаалттай байдаг; хүсэхгүй бол Тохиргоо → Маркетинг хэсгээс унтраана. Сануулгад хөнгөлөлт хэзээ ч автоматаар нэмэгдэхгүй — хямдрал өгөх эсэхийг та өөрөө шийднэ.

3. Meta Pixel ба Conversions API-г холбох

Facebook, Instagram дээр зар явуулж байгаа бол аль зар худалдан авалт авчирч байгааг мэдэх хэрэгтэй. Тохиргоо → Маркетинг хэсэгт Meta Events Manager-ээс авсан Pixel ID-гаа оруулахад дэлгүүр тань бараа үзэх, хайх, сагсанд нэмэх, төлбөр эхлүүлэх, худалдан авах үйлдлүүдийг автоматаар илгээж эхэлнэ.

Нэмээд Conversions API-ийн токеноо оруулбал ижил үйлдлүүд сервер талаас давхар илгээгдэнэ. Зар хаагч, iPhone-ы хязгаарлалт, апп доторх хөтчийн улмаас хөтөч талын хэмжилт тасрах үед ч худалдан авалт Meta-д бүртгэгдэх магадлал нэмэгдэнэ. Токен сервер дээр шифрлэгдэж хадгалагдана. Код бичих шаардлагагүй — хоёр утга хуулж оруулахад л хангалттай.

Тохируулсны дараа Events Manager-ийн «Test events» хэсэгт туршилтын кодоо авч, консолд түр оруулаад дэлгүүрээ нэг удаа гүйлгэж үзээрэй: бараа үзэх, сагсанд нэмэх үйлдлүүд тэнд бодит цагт харагдах ёстой. Шалгаж дуусаад туршилтын кодоо арилгана.

4. Каталогоо Facebook, Instagram-д холбох

Дэлгүүр бүр Facebook Commerce Manager болон Google Merchant Center-ийн ойлгодог хэлбэрээр бараагаа гаргадаг барааны feed-тэй. Консолын Тохиргоо → Интеграц хэсгийн «Барааны feed» картаас CSV эсвэл XML холбоосоо хуулж, Commerce Manager-т хуваарьт татан авалт (Scheduled feed) болгон оруулахад каталог тань тогтмол шинэчлэгдэнэ.

• Зөвхөн нийтлэгдсэн бараа орно; ноорог, өртөг, үлдэгдлийн тоо орохгүй.
• Барааны дугаар нь Pixel-ийн илгээдэг дугаартай ижил тул динамик зар тухайн хүний үзсэн бараатай зөв тохирно.
• Хямдралын үнэ зөвхөн хямдрал идэвхтэй бөгөөд үнийн түүхээр батлагдсан үед гарна.

5. Купон ба хугацаатай хямдралаар шийдвэрийг хурдасгах

Постон дээрх «зөвхөн энэ долоо хоногт» гэсэн санал хүмүүсийг шийдвэр гаргахад түлхдэг. OpenShop дээр үүнийг хоёр аргаар хийнэ:

• Купон — хувиар эсвэл дүнгээр хямдруулах код үүсгэж, дуусах хугацаа тавина. Кодоо постондоо бичихэд худалдан авагч захиалгын хуудсанд оруулна.
• Хугацаатай хямдрал — барааны үнийг хувиар эсвэл дүнгээр хямдруулж, дуусах огноог тавина. Хямдрал өөрөө эхэлж, өөрөө дуусна; загвараас хамааран дэлгүүрт дуусах хугацааны тоолуур гарна.

Хуучин үнийг зурж харуулахын өмнө систем сүүлийн 30 хоногийн үнийн түүхийг шалгадаг. Хямдралын өмнө үнээ зохиомлоор өсгөсөн бол зурсан үнэ, хөнгөлөлтийн хувь харагдахгүй — хямдарсан үнэ өөрөө хэвээр. Ингэснээр худалдан авагч таны хямдралд итгэж, шударга хямдрал тань Hub-ын урамшуулалд оролцох боломжтой болно.

Хамгийн түрүүнд юунаас эхлэх вэ?

Facebook-ээр зар явуулдаг бол эхлээд Pixel-ээ холбоорой — хэмжилтгүйгээр юу ажиллаж байгааг мэдэх боломжгүй. Дараа нь барааны feed-ээ Commerce Manager-т өгнө. Пост, зарын холбоосдоо ?utm_source=facebook гэж нэмбэл тэндээс ирсэн захиалгууд Тайлан хэсэгт «Facebook» гэж тусдаа харагдана; Instagram-д utm_source=instagram гэж бичнэ. Дотоод хөтчийн шилжилт, төлөөгүй захиалгын сануулга хоёр аль хэдийн ажиллаж байгаа тул тусгай тохиргоо шаардахгүй.

Долоо хоног бүрийн шалгах жагсаалт

• Тайлангаас Facebook, Instagram, Hub болон шууд ирсэн захиалгын харьцааг харах.
• Сануулгаар сэргэсэн захиалгын тоог шалгах.
• Events Manager-т худалдан авалтын үйлдэл ирж байгаа эсэхийг шалгах.
• Commerce Manager дээр алдаатай бараа байгаа эсэхийг харах.
• Дуусах гэж буй хямдрал, купоныхоо хугацааг шалгаж, шинэ постоо төлөвлөх.

Бүх хэрэгслийг Маркетинг хуудаснаас үзнэ үү.